ନୂଆଦିଲ୍ଲୀ ୦୧।୦୭: ସାଂଘାତିକ ଖରା ନ ସରୁଣୁ ଅଚାନକ ବର୍ଷା ଆସିବା ଦ୍ୱାରା ଥଣ୍ଡାକାଶ ମାମଲା ବଢିପାରେ । ଏହି ସ୍ଥିତିରେ ପିଲାଙ୍କ କ୍ଷେତ୍ରରେ ଫ୍ଲୁର ଆଶଙ୍କା ବଢିଥାଏ । ସେଥିପାଇଁ ବର୍ଷା ଆସିବା ପୂର୍ବରୁ ନିଜର ତଥା ପରିବାର ସଦସ୍ୟମାନଙ୍କ ରୋଗ ପ୍ରତିରୋଧକ ଶକ୍ତି ବଢାଇବା ପ୍ରତି ଧ୍ୟାନ ଦେବା ଆବଶ୍ୟକ । ଏହି ସମୟରେ ରୋଗ ପ୍ରତରୋଧକ କ୍ଷମତାକୁ ମଜଭୁତ କରିବା ପାଇଁ ଏମିତି କିଛି ଫଳ ସାମିଲ କରିବା ଉଚିତ୍, ଯାହା ରୋଗ ପ୍ରତିରୋଧକ ଶକ୍ତି ବଢାଇବା ସହ ସିଜିନାଲ୍ ସଂକ୍ରମଣରୁ ମଧ୍ୟ ରକ୍ଷା କରିଥାଏ ।
ରସୁଣ
ରସୁଣରେ ଆଣ୍ଟି-ବ୍ୟାକ୍ଟେରିଆଲ୍ ଓ ଆଣ୍ଟି ଇନ୍ଫ୍ଲାମେଟୋରୀ ଗୁଣ ରହିଥାଏ, ଯାହା ରୋଗ ସହ ଲଢିବାରେ ସାହାଯ୍ୟ କରିଥାଏ । କ୍ଲିବ୍ଲ୍ୟାଣ୍ଡ କ୍ଲିନିକ୍ ଅନୁସାରେ, ରସୁଣରେ ଏଲିନ୍ ନାମକ ତତ୍ତ୍ୱ ମିଳିଥାଏ, ଯାହା ଶ୍ୱେତ ରକ୍ତ କଣିକାଗୁଡିକୁ ରୋଗ ସହ ଲଢିବାରେ ସହଯୋଗ କରିଥାଏ। ଆଣ୍ଟି ଇନ୍ଫ୍ଲାମେଟୋରୀ ଗୁଣ କାରଣରୁ ପ୍ରଦାହ କମ୍ କରିଥାଏ ।
ଫ୍ୟାଟି ଫିସ୍
ସାଲମନ୍, ଟୁନା, ମ୍ୟାକ୍ରେଲ୍ ପରି ମାଛରେ ଓମେଗା-୩ ଫ୍ୟାଟି ଏସିଡ୍ ମିଳିଥାଏ, ଯାହା ଇମ୍ୟୁନିଟି ବ୍ୟବସ୍ଥାକୁ ମଜଭୁତ କରିଥାଏ । ଏପରିକି ର୍ୟୁମାଟଏଡ୍ ଆର୍ଥ୍ରାଇଟିସ୍ର ଲକ୍ଷଣକୁ କମ୍ କରିବାରେ ସହଯୋଗ କରିଥାଏ ।
ବ୍ରୋକଲି
ଏଥିରେ ବିଭିନ୍ନ ପ୍ରକାରର ଆଣ୍ଟିଅକ୍ସିଡାଣ୍ଟ ଓ ଭିଟାମିନ୍ ମିଳିଥାଏ, ଯାହା ରୋଗ ପ୍ରତିରୋଧକ ଶକ୍ତିକୁ ମଜଭୁତ କରିବାରେ ସହଯୋଗ କରିଥାଏ । ଏହାବ୍ୟତୀତ ଏଥିରେ ଭିଟାମିନ୍-ଏ’ ଓ ଇ’ ମଧ୍ୟ ରହିଥାଏ, ଯାହା ଇମ୍ୟୁନିଟି ବଢାଇଥାଏ ।
ଦହି
ଦହିରେ ପ୍ରୋବାୟୋଟିକ୍ ମିଳିଥାଏ, ଯାହା ଗଟ୍ ସ୍ୱାସ୍ଥ୍ୟ ପାଇଁ ଲାଭଦାୟକ । ଏହାକୁ ଖାଇବା ଦ୍ୱାରା ମାଇକ୍ରୋବାୟୋମ୍ ସୁସ୍ଥ ହେବା ସହ ଭଲ ବ୍ୟାକ୍ଟେରିଆ ସଂଖ୍ୟା ବଢିଥାଏ । କ୍ଲିବଲ୍ୟାଣ୍ଡ କ୍ଲିନିକ୍ ଅନୁସାରେ, ଗଟ୍ ସ୍ୱାସ୍ଥ୍ୟ ଓ ଇମ୍ୟୁନିଟି ବ୍ୟବସ୍ଥା ପରସ୍ପର ସହ ଜଡିତ ।